Paýtagtymyzdaky “Galkynyş” sport toplumynda ýaş aýratynlyklary boýunça iki toparyň—2000-2001-nji ýyllarda doglanlaryň hem-de 18 ýaşa çenli ýetginjekleriň arasynda taý boksy boýunça Türkmenistanyň çempionatynyň jemleýji tutluşyklary geçirildi.
Şu hepde badalga alan iri möçberli çärä—“Sagdynlyk we bagtyýarlyk” şygary astynda bedenterbiýe-sport we sagdyn durmuş- medeni çäreleriniň biraýlygyna gabatlanan ýaryş iki günüň dowamynda geçirildi hem-de ähli welaýatlardan we Aşgabat şäherinden 200 töweregi türgeni bir ýere jemledi. Taý boksy boýunça paýtagtly ussatlar iň oňat taýýarlygyny görkezip, umumytoparlaýyn hasapda birinji orny eýeledi. Altyn medallara B.Orazmämmedow, M.Amangeldiýew, I.Döwletow, K.Allaberdiýew, O.Nurgeldiýew, A.Orazgylyjow, A.Baýmyradow, B.Meredow, Ş.Şagulyýew, A.Nuryýew, M.Hojamämmedow, Ý.Ylýasow, D.Ataýew, H.Allagulyýew hem-de H.Bäşimow dagy mynasyp boldy.
Daşoguz welaýatynyň ýygyndysynyň wekilleri iň ýokary derejeli medaly dört gezek—U.Karambaýew, I.Tairow, I.Allabergenow hem-de B.Madaminow eýeledi. Munuň özi ýurdumyzyň demirgazyk sebitiniň toparynyň türgenlerine toparlaýyn ýaryşda ikinji orny eýelemäge mümkinçilik berdi.
Hormatly üçünji orna altyn medallaryň 3-sine mynasyp bolmagy başaran Mary welaýatynyň ýygyndysynyň wekilleri—S.Atabalow, M.Mämmedow we G.Saparow eýe boldy.
Indi taý boksy bilen meşgullanýan türkmen ýetginjekleri ýurdumyzyň kubogy ugrunda güýzde geçiriljek ýaryşa taýýarlyk görer. Milli ýygyndymyzyň erkekler düzümi bolsa 17-30-njy maý aralygynda Şwesiýada geçiriljek dünýä çempionatyna taýýarlanýar. Dünýä çempionatynyň öň ýanynda taý boksy boýunça türgenlerimiz okuw-türgenleşik ýygnanyşygyna gatnaşar. Şol ýygnanyşyk Tailandda -- müňýyllyk taryhy bolan başa-baş söweşiň bu görnüşiniň watanynda guralar.
Taý boksy, mälim bolşy ýaly, indiki ýylyň sentýabrynda Aşgabatda geçiriljek Ýapyk binalarda we söweş sungaty boýunça V Aziýa oýunlarynyň maksatnamasyna girýär. Şoňa görä-de, halkara okuw türgenleşik ýygnanyşyklary-da, dünýä çempionaty-da Türkmenistanda geçiriljek Aziada-2017-ä taýýarlyk görmegiň möhüm tapgyrlary bolar.
Hiç yorum yok:
Yorum Gönder