Türkmenistanyň Prezidenti Buýruga Gol Çekdi

2015-nji ýylyň 22-nji dekabrynda Birleşen Milletler Guramasynyň Baş Assambleýasynyň 70-nji mejlisinde kabul edilen “Durnukly köpugurly ulag-üstaşyr geçelgeleriniň döredilmegine ýardam bermek maksady bilen ulaglaryň ähli görnüşleriniň arasynda hemmetaraplaýyn hyzmatdaşlygyň üpjün edilmegi ugrunda” atly Kararnama laýyklykda, Türkmenistanda geçirilmegi göz öňünde tutulýan Durnukly ulag ulgamy boýunça Ählumumy maslahaty ýokary derejede guramak we geçirmek maksady bilen, Türkmenistanyň Prezidenti Karara gol çekdi. Resminama laýyklykda, Türkmenistanda 2016-njy ýylyň ahyrynda geçiriljek Durnukly ulag ulgamy boýunça Ählumumy maslahaty taýýarlamak we geçirmek boýunça Guramaçylyk komiteti döredildi we onuň düzümi tassyklanyldy.

***

Türkmenistanyň Gümrük kodeksini ýerine ýetirmek maksady bilen, Türkmenistanyň Prezidenti Karara gol çekdi. Resminama laýyklykda, Türkmenistanyň çäklerine wagtlaýyn getirilip, gümrük paçlaryndan şertli doly boşadylmaga degişli harytlaryň sanawy tassyklanyldy. 

*** 

Ýurdumyzda ösdürilip ýetişdirilýän mallardan alynýan ýüňi we şondan öndürilýän önümleri, şol sanda elde dokalan haly we haly önümlerini daşary ýurtlara ýerlemegi kämilleşdirmek, şeýle hem ýerli önüm   öndürijileri goldamak maksady bilen, Türkmenistanyň Prezidenti Karara gol çekdi. Resminama laýyklykda, Türkmenistanyň Senagatçylar we telekeçiler birleşmesiniň agzalary bolan edara görnüşli taraplara we hususy telekeçilere Türkmenistanda öndürilýän ýüňi (saryja goýnunyň ýazlyk ýüňünden başga) daşary ýurtlara ýuwulan we ýuwulmadyk görnüşde ýerlemäge ygtyýar berildi.  

*** 

Türkmenistanyň Prezidenti Buýruga gol çekdi. Resminama laýyklykda, wezipe borçlaryny talaba laýyk ýerine ýetirmän, garamagyndaky edaralaryň işine gözegçiligi gowşadandygy üçin, Türkmenistanyň saglygy goraýyş we derman senagaty ministri Amannepesow Nurmuhammet Kakabaýewiçe berk käýinç yglan edildi. 

*** 

Türkmenistanyň Prezidenti Buýruga gol çekdi. Resminama laýyklykda, wezipe borçlaryny göwnejaý berjaý etmän, işde goýberen kemçilikleri üçin, Türkmenistanyň saglygy goraýyş we derman senagaty ministriniň orunbarasy – Döwlet arassaçylyk we keselleriň ýaýramagyna garşy göreşmek gullugynyň başlygy Şamyradowa Leýli Arslanowna berk käýinç yglan edildi we ýol berlen kemçilikleri gysga wagtyň içinde düzetmese, eýeleýän wezipesinden boşadyljakdygy oňa duýduryldy.  

http://www.turkmenhabargullugy.com/haber.php?haber_id=4020